Nağme-i Seher/Arz-ı Sitem

Arz-ı Sitem

Sen sitemkâra gönül baglayalı
Âh u giryeyle geçer evkâtim
Tig-ı hicriñle yürek daglayalı
Hûn-ı dil oldu bütün ekvâtım
Âh kim hiç haberin yok benden
Kime şekvâ edeyim yâ senden
Beni gördükce nedir öyle gazab
Hiç bu evzâ'a tahammülmi olur
Beni öldürmemidir kasdıñ aceb
Bu kadar böyle tegafülmi olur
Baña bir kerre nigâh etmezsin
Gittigim yolda bile gitmezsin
Bilürim sende vefâdan yok eser
Bilmem ammâ ki nezâket de mi yok

Nedir ol çehre o hiddetli nazar
Zâr olan bir kula şefkat de mi yok
İhtiyârî değilim ben de saña
Beni aşk eyledi efgende saña
Hicrine tâb getirmezken ben
Bir de âzâra mı lâyık gördün
Söyle allâhı seversen hele sen
Sana benden kimi sâdık gördün
Bumıdır sende olan resm-i vefâ
Bilmediñ kadrimi zâlim hayfâ
Elverip kesret-i ahbâb saña
Şimdi ettin beni merdûd-ı nigâh
Bulmayıp hiç birini ehl-i vefâ
Soñra ammâ diyeceksin eyvâh
O zamân * Ekrem'i * yâd eylersin
Onu da bulmaz isen n'eylersin