Nağme-i Seher/üzre redifli sitâyiş
Odur şâ'ir ki nazma cür'et ettikçe murâd üzre
Merâmı bî-tekellüf nakşola levh-i fu'âd üzre
Odur şâ'ir ki ta'kîd olmaya nazmında yazdıkça
Tecellî eyleye mazmûnu meclâ-yı midâd üzre
Odur şâ'ir ki âgâz-ı makal ettikçe bî-pervâ
Ola her kavli âyât ü hadîse istinâd üzre
Odur şâ'ir ki şi'ri etmeye tab'a kelâl îrâs
Vere gittikçe zevk u şevk-ı dîger izdiyâd üzre
Odur şâ'ir ki anber-pâş ola her satr- ı eş'ârı
Hat-ı reyhân-nisâr-ı dilber-i hûri-nijâd üzre
Aña şâ'ir denilmez kim geze sük-ı belâgatte
Metâ'-ı şi'ri bin yıl dûş-ı dellâl-ı mezâd üzre
Aña şâ'ir diñilmez kim verip terzîk ile zînet
Ola bî-hûde kilk-i desti teksîr-i sevâd üzre
Aña şâ'ir denilmez kim ola serdî-i tab'ından
Hemân yah-pâre-vârî reşh-i kilki incimâd üzre
Benim ol şâ'ir-i isâ-mü'essir kim gelir nutka
Ger i'câz-ı beyânım olsa feyz-efken cemâd üzre
Eder ammâ ki misl-i kalıb-ı bî-rûh-ı dem-beste
Düşünce tâb-ı fikr-i rûşenim akl-l cevâd üzre
Nigehbânımki şimdi âlem-i nazma olur tab'ım
Ekâlîm-i beyânı ser-te-ser feth ü küşâd üzre
Süleymânımki gîti-i beyâna leşker-i ma'nâ
Olur nâ-çâr hükm-i re 'yime hep inkıyâd üzre
Dilîr-i ma'niyim kim havf-ı şemşîr-i zebânımdan
Olur hussâd-ı dûn-ı kîne - ver arz-ı vedâd üzre
Dür-efşân olsa tab'ım izdihâm-ı ceyş-i ma'nâdan
Çıkar mazmûnlarım hep hâme-i sihr i'tiyâd üzre
Bulunmazsa n'ola gass u semîn nazm-ı belîgimde
Olur akdü'l-le'âl-âsâ sözüm hep ıttırâd üzre
Ne rütbe eylesem tatvîl vasf-ı nazm-ı rengînim
Olur ehl-i dil ü dâniş kemâl-i i'timâd üzre
Bakılsa cümlede var kabiliyyet lîk olmaktır
Garaz feyz-i atâ-yı Hakk'a hüsn-i i'tikâd üzre
Te'âlallah ne bu ikbâl-i feyz-i lutf-ı bârî kim
Gezer kâlâ-yı şi'rim dest-i erbâb-ı sedâd üzre
Pesend itmiş husûsâ nazmımı bir âsaf-ı ekrem
K'odur hâlâ bisât-endâz-ı sadr-ı adl ü dâd üzre
Ferîdûn-baht sadr-ârâ-yı devlet kim müreccahtır
Şükûhu ihtişâm-ı dûdmân-ı Keykubâd üzre
Sütûde arş-ı mesned sadr-ı dîvân-ı celâlet kim
Olur fermânına ser-tâ-ser âlem inkıyâd üzre
Hıdîv-i dâd-güster âlem-i cûd ü mekârim kim
Nisâr-ı nakd-i âmâl eyler efrâd-ı ibâd üzre
...ism ü alî-heybet hakîm-i bû alî-sîret
K'olur ahvâl-i dîn ü devleti hep intikâd üzre
Muhît-i akl u hikmet kim eder ıslâh tedbîri
Bulunsa dâ'iren mâdâr her kişver fesâd üzre
Sikender-mertebet sadr-ı kerem-perver ki devrinde
Reh-i Ye'cûc gam-ı adliyle oldu insidâd üzre
Kader kudret Hudâvend-i cihân kim bîm-i kahrıyla
Ne haddidir ki çerh-i kec-nihâd olsun inâd üzre
Küşâde dergeh-i eltâfı hep a'lâ vü ednâya
Fütâde sâye-i a'tâfı her nâ-şâd ü şâd üzre
Olur bî-şübhe galib şeb-çerâg-ı âlem-ârâya
Düşürse pertevi re'y-i münîrin ger remâd üzre
Olaydı mazhar-ı kem-ter-nigâh-ı re'fet u lûtfu
Yapardı âşiyân pervâne şem'-i şu 'le-zâd üzre
O rütbe mürtefi’dir âsitân-ı dergeh-i lûtfu
Ki salmış sâye-i emn ü emân cümle bil”ad üzre
Budur kim i'tikadım bir müşîr-i sâ'ib ü âkıl
Cihâna gelmeye ol âsaf-ı âlî-nijâd üzre
Bulur tevfik-i hakkaa mazhariyyet her umûrunda
Olunca dergeh-i mevlâya böyle istinâd üzre
O savlet-vâr kim onda tünd-bâd-ı kahrı çâk eyler
Sufûf-ı düşmeni at sürmeden fikr-i cihâd üzre
Bu adl ü lûtf u re'fet varken onda cümle-i âlem
Demez mi yâ Rab olsun ömr ü câhı izdiyâd üzre
Ne sûret bağlar âlem seyredin billâhi adliyle
Hele devr-i sitem-fersâsı olsun imtidâd üzre
Simât-ı cûdu eyler subh ü şâm it'âm-ı her bî-kes
Degil hiçbir gedâ endîşe-i tahsîl-zâd üzre
N'ola kalırsa lâşey cem'-i ezdâd etme yanında
K'olur fermânı cârî âb ü nâr ü hâk ü bâd üzre
Direng-i gerdiş-i eflâki kılsa fi'l-mesel fermân
Eder infâz gerdûn emrin olmaz irtidâd üzre
'Aceb kangı müşîri hakkeder böyle himâyet kim
Olur düşmen dahi olsa ona fart-ı vedâd üzre
Melek-haslet keremkârâ felek-rütbet cihândârâ
Vücûdundur veren revnak makam-ı adl ü dâd üzre
Nice Risto-hıred âsaf işittik senden evvel lîk
Degilmiş mesleginde birisi böyle reşâd üzre
O gün kim sadrı teşrîf eyledin sükkân-ı arş oldu
Muvâzıb bir zamân âvâze-i ferhunde-bâd üzre
Eyâ sadr-ı cihân şi'rim beğenmişsin işittim tâ
Yazılmıştı o günden midhatın levh-i fu'âd üzre
Bi-hamdillah ki oldum lezzet-i vasfınla şîrîn-kâm
Egerçi mümteni'dir midhat-ı zâtın murâd üzre
Bu lufun duymasaydım ger bi-kavl-i Nef'i - i üstâd
"Kalırdı haşre dek bâzâr-ı endîşem kesâd üzre”
Du 'â-yı devletine hasredip min-ba'd-i evkâtim
Kılam sıdkile tab'ım midhatında i'tiyâd üzre
Hulûsun oldu ma'lûm etme ıtnâb-ı sühan * Ekrem *
Kıl îfâ hayr-ı da'vâtın ki vâcibdir ibâd üzre
Yazıp fahriyye tâ kim şâ’irân gâhi kasâ’idde
Temeddüh eyleye bir özge fikr ü i’tikâd üzre
Olup günden güne iclâl ü ikbâli terakkîde
Sa’âdetle ola eyyâm-ı ömrü imtidâd üzre