Nağme-i Seher/ân uyaklı Târîh-i Velâdet
Âb-rû-yı fuzalâ mîr Celâlettin kim
Zâtıdır mazhar-ı eltâf-ı rahîm ü rahmân
O kerîmü'n-neseb ol muhterem-i devrân kim
Fahr eder cevher-i zâtıyla hemâre ihvân
Nüsha-i zâtı kemâlât ile pîrâstedir
Cebhesinden olur âsâr-ı füyûzât ıyân
Zihn-i derrâki hadeng-i hedef-i re'y-i savâb
Kilk-i çâlâki medeng-i der-i genc-i irfân
Hüsn-i tedbîrde endîşesi bî-misl ü nazîr
Feyz-i te'sîrde tedbîri adîmü 'l-akrân
Sâftır âyine-veş tab'-ı latîfi meselâ
Sînesinden görünür baksan eğer sırr-ı nihân
Pakdır bâde gibi meşreb-i şûhu hakka
Lezzet-i ülfeti ehl-i dili eyler ferhân
Yazsa ahlâkını gül-berk gibi vassâfın
Safhası eyleye ta'tîr-i meşamm-ı dil ü cân
Satha-i kalbi bir âyine-i vahdettir kim
Murg-ı kuds olsa sezâdır ona tûtî-i beyân
Akl-ı pîrânesi magbût-ı dil-i ehl-i kemâl
Tavr-ı merdânesi mahsûd-ı gürûh-ı rindân
Medh-i fazl u hüneri sohbet-i ehl-i insâf
Vasf-ı cûd ü keremi güft ü şinîd-i yârân
Çok mu nâz eylese devrâna ki kılmış mevlâ
Kurretü'l-ayn-ı recâ'î-i celîlü 'l-unvân
Ne recâ'î o hüner-perver-i bî-hemtâ kim
Ehl-i dil zâtını bu tarz ile eyler ityân
Ma'den-i lutf u himem masdar-ı envâ'-ı kerem
Gîti-i fazl u atâ âlem-i cûd u ihsân
Hased-efrûz e'âlî-i vezîrân-ı Arab
Edeb-âmûz-ı kibâr-ı ulemâ-yı Îrân
Tâb-ı re'yi felek-i ma'nîye hûrşîd-i münîr
Reşha-i kilki riyâz-ı sühana âb-ı revân
Bezm-i ayşında melek şâhid-i tâbende-izâr
Bâb-ı lütfunda felek hâdim-i dâmen-be-miyân
O Hudâvend-i felek-câh kerîmü'ş-şân kim
Dâ'ir-i hizmetidir şevkla çerh-i gerdân
Olayım vasf-ı şerîfinde güher-senc-i makal
Gerçi hakkıyla edâ vasfını olmaz âsân
Yazayım şöylece her fende olan kudretini
Nakş-ı eltâfına sonra edeyim atf-ı inân
İlm-i Fürs ü Arabî fenn-i riyâzi vü hikem
Ezelî mevhibetu'llahtır ona bî-noksân
Müctemi' dâ'ire-i müdrike-i pâkinde
Sarf ü nahv ü edebiyyât ü me'âni vü beyân
İlm-i tefsîr ü ehâdîste Fahr-ı Râzî
Fehm-i eşkâl-i mesâ'ilde Felâtûn-ı cihân
Gelmedi şimdiye dek âleme bir misli dahi
Hüsn-i tertîb-i makalât u tasavvurda hemân
Bilse inşâsını vassâfı olurdu vassâf
Görse eş 'ânını tahsîn kılardı Hassân
San 'at-ı hatt-ı celîde hele misli nâ-bûd
Nesh ü ta'lîki ise cümleye buldu rüchân
Ger sülüs hattını görseydi kırardı kalemin
Gayret-i cehle uyup reşkle Hâfız Osmân
Kâgıd üzre nazarı rik'ası âşüfte eder
Rişte-i sîme dizilmiş gibi dürr-i galtân
Bir hafîd eyledi ihsân ona Hak celle celâl
Kerem ü âtıfet ü lütfuna gördü şâyân
Ne hafid ol gül-i sad-berg-i çemenzâr-ı murâd
Kim olur ta'ne-zen-i gonce-i bâğ-ı rızvân
Tâk-ı gehvâre-i pür-cünbüşü çerh-i ikbâl
Pertev-i rûyu ona mihr ü meh-i nûr-efşân
Yaraşır tehniyet-i makdem-i mes 'ûdu içün
Olsa ger tâkçe-i mehdine mihr âvîzân
Hüsnü bir mertebe-âlî ki meh ü mihr-i felek
Olamaz pîş-i likasında birer âyine-dân
O perî-zâd-ı rubâyende-i akl u hûşun
Dâye-i terbiyesi olsa sezâ hûr-ı cinân
Vâlid ü cedd-i keremkârı ile ol tıflı
Hak mu'ammer kıla tâ âhir olunca devrân
Dedim * Ekrem * ona bir beytle mühmel ta'rîh
Tab'ıma şevk-ı kudûmü olıcak feyz-resân
Subh-dem tâli' olup sa'dle hûrşîd-misâl
Oldı iclâl hanım şa'şa'a-efrûz-ı zamân
sene 1282