Nağme-i Seher/hayf redifli Tahmîs-i Gazel
Şu'le-bâr oldı göñülde hançer-i âzâr hayf
Cân u dil sûz-ı sitemle oldı âteşzâr hayf
Ye's edip çeşm-i ümîdi tîre-ver nâ-çâr hayf
Görmedi gönlümce hüsnün dîde-i hûn-bâr hayf
İtdi hayretle tecellî tûr-ı dilde yâr hayf
Dâmeninden eksik olmaz hûn-ı dil peykânınıñ
Hâne-i dildir mekânı hançer-i müjgânınıñ
Haddi yok pâyânı yoktur gerçi kim ihsânınıñ
Zulm ile bağlar o hûnî çeşmini kurbânınıñ
Can alır bir lâhzavermez fırsat-ı dîdâr hayf
Cevr ile zindân-ı mihnettir derûnum rûhuma
Eylemem şekvâ yine ben dilber-i memdûha
Bir nigâh etmek de yok mu bu dil-i meşrûha
Sanma bakmaz şefkatinden sîne-i meşrûha
Nazra-i lûtfun esirger bizden ol gaddâr hayf
Dûr olub evvel göñülden kayd-ı cân hırmân ile
Çâk çâk olsun tenim tîg-ı gam-ı devrân ile
Dil esîr-i mihnet olsun firkat-i cânân ile
Şöyle bî-tâb et ilâhî cismimi hicrân ile
Kim desin gördükçe hâlim yâr hayf agyâr hayf
Şerh-i hâlim gamze-i ser-mest-i pür-hâbındadır
Merhem-i zahm-ı derûnum tîg-ı pür-tâbındadır
Dârû-yı cism-i za'îfim mevc-i zehr-âbındadır
Haste-i aşkım hayâtım çeşm-i bî-tâbındadır
Derd-i dil mühlik tabîb-i derd-i dil bîmâr hayf
Eyledi bir zerre * Ekrem * dâg-ı sînemden bürûz
Kıldı yekser âlemi dûzah gibi pür-tâb u sûz
Âh u zâra vakfolup bî-çâre dil her şâm u rûz
Eyledi îkaz nâlem fitne-i haşrı henûz
Olmadı çeşm-i ümîdim * Nâmıkâ * bîdâr hayf