Nağme-i Seher/Tevhîd
Meded ey kilk-i feyzkâr meded!
Ettim azm-i senâ-yı Rabb-ı ahad
Celle şânühü zehî ilâh-ı samed
Lem-yezel lem-yelid velem yûled
"Her giyâhî ki ez-zemîn rûyed
Vahdehû lâ-şerîke leh gûyed"
O Hûdavend-i kadir ü kahhâr
Ki eder dehre lûtfunu îsâr
Gösterir zâtını bütün âsâr
Nice mümkün vücûdunu inkâr?
"Her giyâhî ki ez-zemîn rûyed
Vahdehû lâ-şerîke leh gûyed"
Bâd u kûhsâr u merg u cûy-ı revân
Ahter ü mâh u mihr-i nûr-efşân
Her biri bir lis"an ile her ân
Vahdet-i hâlık eder i'lân!
"Her giyâhî ki ez-zemîn rûyed
Vahdehû lâ-şerîke leh gûyed"
Hikmeti kıldı âlemi îcâd
Anda gösterdi nice kevn ü fesâd
Kılmak üzre vücûduna işhâd
Kim odur kudretiyle bî-endâd
"Her giyâhî ki ez-zemîn rûyed
Vahdehû lâ-şerîke leh gûyed"
Hayf kim ba'zı câhilân-ı ânud
Olarak çirk-i şirk ile âlûd
Hakkı bir kaç gümân eder yâhud
Eyler inkâr-ı Hak velîk çî sûd
"Her giyâhî ki ez-zemîn rûyed
Vahdehû lâ-şerîke leh gûyed"
Ey eden kudreti beni bî-hûş
Eylesem her ne dem havâle-i gûş
Duyarım kim bütün cemâd u vuhûş
Zikr ü fikrinle olmada pür-cûş
"Her giyâhî ki ez-zemîn rûyed
Vahdehû lâ-şerîke leh gûyed"
"Ekreme" cây olunca taht-ı serâ
Eylesin aşk-ı pâk-i zât-ı Hûdâ
Sebz-i hâk-i mezârını gûyâ
Ki desin istimâ' eden Hakk'a
"Her giyâhî ki ez-zemîn rûyed
Vahdehû lâ-şerîke leh gûyed"