Nağme-i Seher/Kafiye-i Hâ/Yedinci Gazel

Başladı îmâ-yı va'd-i vasla ebrûlar yine
Etmeseydi bir füsûn ol çeşm-i câdûlar yine
Sen de azm-i bâg ü râg et gel açıl ey gül-nihâl
Pertev-efşân olmada her sûya meh-rûlar yine
Çektim ol meh-pâreyi âguşa sardım sîneme
Oldu mîzâb-ı safâ cismimdeki mûlar yine
Bî-tekellüf aldı mürg-ı aklımı çeşmân-ı yâr
Andelîb-i cân-şikâr etti piristûlar yine
Eşkimi ardınca icrâ ettim ol ser ü kadin
Bâgda hayrette kaldı servler cûlar yine
Bu Nedîmâne neşîdem seyredip *Ekrem* sezâ
Reşk ederse tab'ıma yek-ser sühangûlar yine