Nağme-i Seher/Kafiye-i Bâ/Dördüncü Gazel

by Recaizade Mahmut Ekrem

Hengâme-i bahâr ne âlemdedir aceb
Devr-i safâ-medâr ne âlemdedir aceb
Âlem esîr-i keşmekeş-i devlet oldu hep
Fakrile iftihâr ne âlemdedir aceb
Baş başa verdi fitnede her târ-ı perçemi
Duymaz mı rûzgâr ne âlemdedir aceb
Fikr-i hatıñla çıktı gönülden dem-i seher
Âh-ı şerâre-bâr ne âlemdedir aceb
Pervâne-vâr mahv-ı vücûd etti âşıkan
Ol şem'-i şu'le-dâr ne âlemdedir aceb
*Ekrem * rahîk-ı nazınla ben mest-i hayretim
Üstâd-ı Cem-şi'âr [1]^[1]ne âlemdedir aceb

Ol şâ'ir-i yegâne ki şibh ü nazîrini
Der hulk-ı rûzgâr ne âlemdedir aceb

1. [1] Birâderim izzetlü Mehmed Celâl Beyefendi murâd olunmuştur.