Hikmet-14
Eya dostlar nâdân birle ülfet bolup
Bağrım küyüb candın toyup öldüm mena
Toğrı aytsam egri yolga boynım tolğar
Kanlar yutup gam zehrige toydum mena
Nâdân birle ötken ömring nar sakar
Nâdân bolsa duzah andın kılgay hazer
Nâdân birle duzah sarı kılmang sefer
Nâdân içre hazan yanglığ soldum mena
Dua kılıng nâdânlarnı yüzün körmey
Hak Te'ala refik bolsa bir dem turmay
Bimar bolsa nâdânlarnı halin sormay
Nâdânlardın yüz ming cefa kördüm mena
Dad eylesem Hak dâdımge yeter mukin?
Köksümdeki zengarlarım keter mukin?
Hemme nâdân bu alemden keter mukin?
Nâdânlardın yüz ming cefa kördüm mena
Hak vaslını izlep tabmay hayranemen
Tınmay yığlap köngli buzuk divanemen
Halim sorsan men talib-i cananemen
Canan izlep fena bolup keldim mena
Yer astıga kaçıp kirdim nâdânlardın
Elkim açıb dua tilep merdanlardın
Garib canım yüz tasadduk dânâlardın
Dânâ tabmay yer astıga kirdim mena
Nâdânlarnı mendin sorma köksüm çaka
Hak'dın korkub matem kursam küler kahkah
Ağzı açuk nefsi uluğ misli lakka
Nâdânlardın korkup senge keldim mena
Tama kılma nâdânlardın kadring bilmes
Zulmet içre yol adaşsang yolga salmas
Boynung kısıp zari kılsang kolung almas
Nâdânlarnı şikve eyleb keldim mena
Evvel ahır hublar ketti kaldım yalğuz
Nadânlardın işitmedim bir yahşi söz
Dânâ ketti nâdân kaldı yedim efsus
Yolnı tabmay hayran bolup kaldım mena
Dağ-ı hicran ezdi bağrım kani derdmend
Dânâ tufrak nâdânlarnı köksi belend
Ayet hadis beyan kılsam kılmas pisend
Köksüm teşing derd u gamga toldum mena
Derd u halet tuğyan kıldı bar mu tabib
Arz-u halim senge aytay yalğuz habib
Barça talib uluş aldı men bi-nasib
Uluş istep düta bolup keldim mena
Han-ü manıng terk eyleben uluş algıl
Ey bi-haber dünya işin arka salgıl
Allah sahi lutfın körüb hayran kalgıl
Köremen dep fena bolup keldim mena
Men defter-i sani aytdım sizge yâdgar
Ervahımdın meded tileb okung zinhar
Dua kılay vasıl kılsun Perverdigar
Rahman İgem arz etgeli keldim mena
Hikmetimdin behre algan közge sürsün
İhlas birle közge sürtüb didar körsün
Şartı oldu riyazetge boyun sunsun
Canlar keçip Canane'ni kördüm mena
Didar üçün geda boldum amin dengler
Ey talibler halim körüb gamım yengler
Yolda kalgan Kul Ahmed'ge yol beringler
Yolnı izlep geda bolup keldim mena
Kul Hace Ahmed geda bolsang Hakk'a bolgıl
Başıng birle erenlerge hizmet kılgıl
Nazar tabsang halka kurup suhbet kılgıl
Halka içre âgâh bolup turdum mena
|
Kaynak: "Divan-ı Hikmet orijinal metin (I. Kısım)". sufism.20m.com. 6 Aralık 2010 tarihinde kaynağından arşivlendi. 
Bu eser, başka bir eserin bilimsel olmayan metodlarla oluşturulmuş bir transkripsiyonu veya faksimilesi olup ana eserden bağımsız bir telif hakkı korumasına sahip değildir. 5846 sayılı Fikir ve Sanat Eserleri Kanunu'un işlenmiş eserleri tanımlayan 6. maddesine göre; henüz yayımlanmamış olan bir eserin ilmi araştırma ve çalışma neticesinde yayımlanmaya elverişli hale getirilmesi (ilmi bir araştırma ve çalışma mahsulü olmayan alelade transkripsiyonlarla faksimileler istisna olmak üzere) halinde oluşturulan eser telif korumasına tâbi olacaktır. Ancak bu eser kanunun gösterdiği istisna kapsamında olduğundan kamu malıdır. 
|