Hamdülillah olmuşum âlemde ser-germ-i murâd
Neşve-i aşkıñla bî-peymâne-i ser-şâr-ı feyz
Mâlikim şimdi gam-ı aşkın gibi bir servete
Nakd-i ihlâsıyla oldum tâcir-i bâzâr-ı feyz
Mümtezic lâ'l-i lebinde mâye-i rûh-ı revân
Münderic hatt-ı ruhunda ma'ni-i esrâr-ı feyz
Dâg ü şerhayla dilim bir gülsitân-ı şu'ledir
Cûy-ı eşk-i berk-hîzimdir ona enhâr-ı feyz
Kâse kâse hûn-ı dil nûş eylerim çekmem azâb
Bulmasam câm-ı ceminde âlemin âsâr-ı feyz
Rind sahbâ-nûş-ı bezm-i vahdetim * Ekrem * n'ola
Olsa tab'-ı pür-hurûşum bahr-ı gevher-bâr-ı feyz
Mahv eyledi nişânımızı rûzgâr hayf
Ne üstühan bıraktı ne hâk-i mezâr hayf
Taht-ı serâda koymadı râhat bizi felek
Rencîde kıldı cismimizi mûr u mâr hayf
Geldim niyâza dergehine sîne çâk çâk
Bir nazra kılmadı o büt-i gamzekâr hayf
Pîçîde oldu târik-i reh-gîr-i zülfüne
Âhir bu kayda düştü dil-i bî-karâr hayf
