16 — Uhuvvet-i umumiyenin tesisini isteyen Halk Zümresi muharebe ve mücadeleyi ancak tahakküm ve istilâ davalarına mani olmak ve emperyalizmi imha ile beyne'l beşer fitneyi izale etmek için meşru görür. Ve bu vazifeyi bilâ-istisna her fert hakkında istitaat nisbetinde hem malen hem bedenen mecburi telâkki eder.
17 — Zümre, ictimai, idari ve ahlaki noksanlar, izale sırasında küûl, fuhuş, kumar, ırza tasallut, sirkat ve emsal-i zemaim-i ahlakiyenin men ve nehyini de olanca ehemmiyetiyle nazar-ı itibara alacaktır.
18 — Zümre, mektep tahsilini cemiyetin hayat-ı müşterekesindeki esasat-ı sahihiyeye göre meccani, mecburî ve leylî olarak te'yide taraftardır. Her tarafta mektepler ve umumi kütüphaneler açılarak okumadık kimse bırakılmayacaktır. Müessesat-ı ameliye ve fenniyenin adetleri teksir olunacak ve bunların cümlesi hükümetin idaresinde ve meccani olacaktır.
19 — Umur-ı maliyede zümrenin gayesi mesai-i umumiyeyi hüsn-i tanzim ve tevzi edebilmektir. Bu gaye temin olununcaya kadar vergilerde nisbet-i adileye ihtimam olunacak, ikinci sınıf olan isçi ve köylü şimdiye kadar ezildikleri bâr-ı tekâliften kurtarılacaktır.
20 — Arazinin rakabesi beytü'l-male aittir. Toprakları olmayanlara hükümetçe kâfi miktarda ve bilâ-bedel arazi verilerek her bir rençberin hür ve müstakil çalışabilmesi ve bu suretle toprakların azamî imar ve istihsarı temin olunacaktır. Bu husus kanun-ı mahsusla tesbit edilecektir.
21 — Emekçilerin (işçi ve köylülerin) meskenleri kavaid-i sıhhiyeye muvafık olması ve bunların çalıştıkları mahallerde her türlü tehlikeden masun bulunmaları hükümetçe temin edilecektir.
22 — Eczahaneler ve hastahaneler hükümetin taht-ı idaresindedir. Hastalık halinde meccanen tedavi edilmek her ferdin hakkıdır.
23 — Halk Zümresi, sâ'y-ı zâtisiyle cemiyet hayatında mevki bulamayacak acezeyi ve ihtiyar, malûl, mariz olanları hayat-ı umumiyenin aynı derecede menafi-i müştereke ve mütesaviyesinden
