Sanâyi taburları neferlerinin sayılarının artırılmasına dâir
İrâde Dâhiliye 46461
'Atûfetlü Efendim Hazretleri,
Sanâyi’ tabûrları mevcûd-ı hâzırı olan bin sekiz yüz nefer üzerine dört yüz on dört nefer daha zammıyla ma’a-zâbitân bin yetmişer neferden mürekkeb olmak ve i’mâlât ve mühimmât ve matba’a-i askeriyyeye ve İzmit ve İslimiye fabrika-i hümâyûnlarıyla kılora ve debbâğ ve dökümhânelere müte’allik işlerde kullanılmak üzere iki tabûra taksîmine ve teferru’âtına dâir Dâr-ıŞûrâ-yı Askerî’den kaleme alınan mazbata savb-ı vâlâ-yı sipeh-sâlârîden meb’ûs tezkire ve evrâk-ı melfûfe ile ‘arz u takdîm kılındı, me’allerinden müstebân olacağı vechile hülâsa-i tasavvurât ve mutâla’ât nizâmiyye dâiresine âid i’mâlâtın tekessür ü tezâyüdüne ve şimdiki tabûrlar efrâdının bunlara ‘adem-i kifâyetine binâen umûr-ı i’mâliyyenin te’mîn ve teshîl-i hüsn-i cereyânı makâsıdına mübtenî olup vâkı’â veliyy-i ni’met-i bî-minnetimiz pâdişâhımız efendimiz hazretlerinin eser-i müstakill-i ihsan u ‘inâyet-i seniyyeleriyle kuvve-i berriyyenin vâsıl olduğu derecât-ı ‘âliyye-i terakkiyât iktizâsınca levâzımı dahî tezâyüd ü tekessür eylediğinden ve bu şeyler için hâricden kullanılmakta olan amelenin muntazam’ül-ahvâl olmamaları cihetle emr ü idâre ve istihdâmlarında müşkilât ve masârifâta tesâdüf olunmakta idüğünden levâzımât-ı muharrere-i cünûdiyyenin tanzîm ü tezyîd-i vesâit-i i’mâliyye ve inşâiyyesi ehemm ü elzem bulunmuş ve Dâr-ıŞûrâ’nın mazbata-i mebhûsasında beyân olunduğu vechile ba’d-ezîn bi’l-cümle anbar ve fabrikalarda ‘amele-i hâriciyye kullanılmayarak i’mâlât işleri kâmilen açılacak tabûrlar efrâdına gördürüldüğü halde işbû tabûrların masârifât-ı mukannenesi çıktıktan sonra bir hayli tasarruf dahî vukû’ bulacağıanlaşılmış olduğuna mebnî ber-mûceb-i mazbata u tezkire îfâ-yı mukteziyyâtıirâde-i isâbet-i mu’tâde-i şehriyârîye mu’allakan münâsib gibi mütebâdir fikr-i kâsır olmuş ise de yine emr ü fermân-ı ilhâm-efşân-ı hazret-i cihândârî her ne merkezde şeref-pîrâ-yı sahîfe-i sünûh u sudûr buyurulur ise mantûk-ı münîfi infâz olunacağı ifâdesiyle tezkire-i senâ-veri terkîm olundu efendim. Fî 29 RA sene 290.
Ma’rûz-ı çâker-i kemîneleridir ki, ...
|
Kaynak: Ünal, Uğur (2006). Sultan Abdülaziz Devri Osmanlı Kara Ordusu (1861-1876) (PDF) (Doktora). Ankara: Gazi Üniversitesi. Erişim tarihi: 11 Eylül 2021. 
Bu eser, başka bir eserin bilimsel olmayan metodlarla oluşturulmuş bir transkripsiyonu veya faksimilesi olup ana eserden bağımsız bir telif hakkı korumasına sahip değildir. 5846 sayılı Fikir ve Sanat Eserleri Kanunu'un işlenmiş eserleri tanımlayan 6. maddesine göre; henüz yayımlanmamış olan bir eserin ilmi araştırma ve çalışma neticesinde yayımlanmaya elverişli hale getirilmesi (ilmi bir araştırma ve çalışma mahsulü olmayan alelade transkripsiyonlarla faksimileler istisna olmak üzere) halinde oluşturulan eser telif korumasına tâbi olacaktır. Ancak bu eser kanunun gösterdiği istisna kapsamında olduğundan kamu malıdır. 
|