Nice bir Zülf Gibi Hâk İle Yeksân Olalım
— Murabba—
Nice bir zülf gibi hâk ile yeksân olalım
Nice bir turraları gibi perişan olalım
Açılalım leb-i dilber gibi handân olalım
Cür’adânı getür Abdal yine hayrân olalım
Silelim gel berü âyine-i kalbin tozını
Açalım kûhl-i gubâr ile yine can gözini
Kulağa komayalım Hâce Fakîhin sözini
Cür’adânı getür Abdal yine hayrân olalım
Kalmayub gülşen-i dilde eser-i hâr-ı melal
Yeridir açıla yer yer gül-i gülzâr-ı hayâl
Müfti-i aşk çü fetvâ virüben itdi helâl
Cür'adânı getür Abdal yine hayrân olalım
Yıkuben zühd ü vera’ mülkini giryân idelim
Girelim cân ü gönül şehrini seyrân idelim
Cem’ olub bir araya sohbet-i rindân idelim
Cür’adânı getür Abdal yine hayrân olalım
Nice bir âyine-i câm ile hodbin olalım
Nice bir bâde-i hamrâ gibi rengîn olalım
Gele yek reng gedâlar gibi miskin olalım
Cür’adânı getür Abdal yine hayrân olalım
Aşk esrârının anlamağa keyfiyyetini
Ni’met-i hân-ı gamın almak içün lezzetini
Hayretî’nin dahi arturmak içün hayretini
Cür’adânı getür Abdal yine hayrân olalım