Nağme-i Seher/Kafiye-i Kâf/Birinci Gazel
Kâfiye-i kâf aded-i gazel 3
Akl ile teslîm olunsun mu bekası âlemin
Kim hudûsundan nümâyândır fenâsı âlemin
Yok gören bir ni'met-i şîrîn-güvârın hem yine
Hân-ı devletden kesilmez iştihâsı âlemin
Mest-i bî-tâb et beni sâki getir rıtl-ı girân
Dûr ola dilden gam-ı tâkat-rübâsı âlemin
Seyr için bir kez cemâlin şarktan tâ garba dek
Devr eder her rûz mihr-i pür-ziyâsı âlemin
Kays-veş selb-i şu'ûr et râhat ol ey bî-huzûr
Aşkla dîvâne olmaktır safâsı âlemin
Eylesiñ azm-i reh-i dâr-ı bekâ *Ekrem* n'ola
Kim tahammülden birûn oldu cefâsı âlemiñ