Hayâl-i Yâr

Bir zıll-i girîzân ile derbeste olan nûr
Bir perdenin altında kalan bedr-i münevver
Tarzında belirsiz.. o kadar mübhem ü meftûr
Bir hâl ile şeklin nazarından güzer eyler;

Sâat-ı şebâbım gibi mehcûr, o kadar dûr
Geçmekte hayâlin.. o hayâl-i ter ü dilber;
Gûyâ kara bir bürka-i nisyân ile mestûr
Bir hüsn-i tahassürzede, bir hüsn-i mükedder!

Dîvânece bir aşk ile aylarca seviştik;
Hâlâ duruyor kalbimin üstünde o hisler;
Bilmem ki o hislerde hayâlin niçin eksik?

Rûhumda sönüp gitti şuaât-ı cemâlin,
Âfâk-ı hayalimde yetîmâne gülümser
Bir gözyaşı renginde olan çeşm-i hayâlin!...

Cenab Şahabeddin