Adana ve Mersin'e asker gönderilmesi talebi

Adana ve Mersin'e asker gönderilmesi talebi

Adana Valiliğince, Hamidiye kazasında çıkan olaylar, vilâyet merkezindeki son durum ve asayişin sağlanması için alınan tedbirler hakkında bilgi verilip yabancılar ve konsolosların ikamet etmekte oldukları Mersin ve Adana'ya ilâve askerî kuvvet gönderilmesi talebinde bulunulması üzerine, talebin Harbiye Nezâreti'ne iletildiği ve Valilik'ten de söz konusu kuvvet gelene kadar asayişin sağlanması için gerekli tedbirlerin alınıp malî müesseseler ile yabancılar ve konsoloslara yönelik herhangi bir saldırıya meydan verilmemesinin istendiği (Tarih: 15 Nisan 1909) (BEO, 3536/265127)

Telgrafnâme
Mahrec Merkezi: Adana
Mahalli Numarası: 1167

Huzur-ı Sâmî-i Sadâret-penâhî'ye

Hamidiye Kazası'nda dahi iğtişâşât zuhur ederek katliâm ve yağma başlamış. Oraya Yarpuz Redîf Taburu'ndan efrâd i‘zâmı icab edenlere bildirilmekle beraber ulema ve eşrafın nesâyih-i lâzıme ifasıyla teskin-i heyecan ve iğtişâşa itina olunması cevaben bildirilmişdir. Merkezde heyecan ve silah sesleri ber-devamdır. Fermân.

Fî 1 Nisan sene [1]325

Adana Valisi
Cevad

Telgrafnâme
Mahrec Merkezi: Adana
Mahalli Numarası: 1191

Huzur-ı Sadâret-penâhî'ye

Bugün sabahdan akşama kadar devam eden iğtişâşın akşam olmak münasebetiyle bi'n-nisbe kesb-i hiffet eylediği ve her türlü tedâbîr-i teskiniyeden geri durulmayıp mülhakâtın te’min-i asayişi için de fırkaya mensub redîf taburlarının peyderpey sür‘at-i mümkine ile silah altına alınmakda olduğu ve şimdi Tarsus'dan ve Misis'den vürûduna intizâr olunan yüz elli efrâd-ı redîfe ile müretteb kollara bir kat daha takviyet verileceği berây-ı malumât ma‘rûzdur.

Fî 1 Nisan sene [1]325

Adana Valisi
Cevad

Sadâret-i Uzmâ
Mektubî Kalemi
Tarih: 24 Ra. sene [1]327 - 2 Nisan sene [1]325

Harbiye Nezâret-i Celîlesi'ne

1 Nisan sene [1]325 tarihli tezkireye zeyldir. Merkez ve mülhakât-ı vilâyetçe asayişin te’mini için çalışılmakda ise de fırkaya mülhak redîf taburlarının sür‘at-i celb ve cem‘i müte‘assir olduğundan bahisle ecânib ve konsolosların makarrı bulunan Mersin ile nefs-i Adana'ya bir muâvenet-i mahsusa olmak üzere Beyrut'dan serî‘an bir-iki tabur asâkir-i nizâmiye yetişdirilmesi lüzumuna dair Adana Vilâyeti'nden bu sabah alınan telgrafnâme leffen savb-ı devletlerine tisyâr kılındı. Diğer tezkire ile bildirildiği üzere vilâyet-i mezkûrede takrîr-i sükûn ve inzibât için en yakın mahallerden serî‘an kuvâ-yı kâfiye tertib olunarak Adana ve Mersin'e sevki ile beraber mikdarının peyâpey derece-i kifayete bir gün evvel iblâğı ve asayişin cihet-i mülkiye ile müttehiden bir dakika evvel iade ve takrîri zımnında kumandanlığa tebligât-ı âcile ifasına himmet.

Adana Vilâyeti'ne

C. 2 Nisan sene [1]325. Takrîr-i sükûn ve inzibât için en yakın mahallerden serî‘an kuvâ-yı kâfiye tertib olunarak peyâpey sevki ile beraber mikdarının peyâpey derece-i kifâyete bir gün evvel iblâğı ve asayişin cihet-i mülkiye ile müttehiden bir dakika evvel iade ve takrîri zımnında Harbiye Nezâreti'ne tebligât-ı ekîde ifa olundu. Asâkirin vürûduna kadar asayişin te’mini esbâbı cihet-i askeriye ile müttehiden kararlaşdırılarak ve dahil-i şehirde kollar tertib olunarak yağmagerliğe ve müessesât-ı maliye ile ecânibe ve konsoloslara bir taarruz vuku‘una zinhâr meydan verilmemesi tavsiye olunur.