Adana Valiliği'nin Nizamiye Süvarisi ve top talebi

Adana Valiliği'nin Nizamiye Süvarisi ve top talebi

Dörtyol'da yeni bir karışıklık çıkmasına fırsat vermemek için Adana Valiliğince en az 200 nizamiye süvarisi ile 2 top talep edildiği (Tarih: 2 Mayıs 1909) (DH. MKT, 2798/99)

Telgrafnâme
Mahrec Merkezi: Adana
Sevk Numarası: 489

Dahiliye Nezâret-i Celîlesi'ne

Dörtyol'da şimdilik âsâr-ı sükûn rû-nümûn ise de tekrar bir vak‘anın hudûsuna mahal kalmamak ve tedâbîr-i kat‘iye ve ihtiyâtiyeden olmak üzere takrîr-i asayişe kadar lâ-ekal iki yüz nizâmiye süvarisi ile iki topun sür‘at-i i‘zâm ve irsâli hususu mahallinden yazılıyor. Süvariye olan ihtiyac fevkalâde şedîddir. Buraya sevki şifahen emredilen süvariler nerededir; ne suretle ne vakit gelebileceklerinin emr u iş‘ârıyla beraber bunların behemehâl sür‘at-i sevk ve i‘zâmları ve topa olan ihtiyac cihet-i askeriyeden te’yid olunmakda olduğundan Harbiye Nezâreti'ne emr-i ekîd ihsân buyurulması ma‘rûzdur. Fermân.

Fî 18 Nisan sene [1]325

Vali
Mustafa Zihni

Dahiliye
Mektubî Kalemi
Telgraf Kısmı
Tarih: 19 Nisan sene [1]325

Telgrafnâme

Adana Vilâyet-i Behiyyesi'ne

C. 18 Nisan sene [1]325. İki topla iki yüz süvarinin süratle Dörtyol'a îsâli lüzumu Harbiye Nezâreti'ne ehemmiyetle yazıldı. Bunların vusûlüne kadar muhafaza-i asayişe ihtimâm olunarak muhill-i sükûn ahvâl tekevvününe zinhâr meydan verdirilmemesi hasâfet-i aliyyelerinden muntazardır.