İmamların Vebadan Ölenlerin Cenaze İşlerini Yapmamaları Üzerine Hazırlanan Buyruldu

İstanbul ve Üsküdar ve Galata ve Haslar kādîlarına başka başka;

Bi-hikmetullâhi te‘âlâ bu esnâda Dersa‘âdet ve civâr u etrâfa müstevlî olan hastalık cihetiyle ba‘zı e’imme mahallâtda zuhûr iden cenâzeyi gasl ve techîz ve tekfîn ve telkīnde sûret-i istinkâf ibrâzına ibtidâr eylediklerine binâ’en ümmet-i Müslimîn mevtâlarını kaldırmakda mübtelâ-yı su‘ûbet oldukları bu def‘a tahkīk olunup e’imme mahallâtın bu vechle hidmet-i mezkûrede betîâne hareket ve sûret-i istiğnâya teşebbüs ve mübâderetleri şer‘-i şerîf iktizâsına ve rızâ-yı âlîye mugāyir olmağla imdi Dersa‘âdet’de olan bi’l-cümle e’imme-i mahallâtı huzûrunuza celb ve ihzâr ile ma‘âzallahu te‘âlâ bundan böyle o makūle cenâze zuhûrunda kat‘â betâ’et ve te’hîri tecvîz olunmayarak ve i‘râz-gûne hareketi tecvîzden mübâ‘adet olunarak hizmet-i lâzımelerini îfâya dikkat eylemeleri husûsunu tenbîh ü te’kîde mübâderet eyleyesiz deyu buyruldu.

Fî 2 L sene [12]27/9 Ekim 1812.