Çocukların Elinde Telef Edilen Kuşlara Dair Av Yasağı

Sekbânbaşı Ağa’ya

Bi-hikmetullâhi te‘âlâ bir müddetden beru ibâdullâha illet-i vebâ yine müstevlî olup hikmet-i zâhiriyesi nâsın mugāyir-i rızâ-yı Bârî envâ‘-ı gûne fısk u fücûr ve harekât-ı nâ-sezâyı ve gûnâgûn mel‘aneyi irtikâb ve menâhî ve münkirâtdan adem-i ictinâbları kaziyyesi olmağın bundan böyle her hâl u hareket rızâ-yı Bârî’ye tatbîk ve muktezâ-yı şer‘-i şerîfe tevfîk olunmak lâzımeden oldığı misüllü ba‘zı meşhûr mel‘abenin dahi def‘i iktizâ-yı vakt u hâlden olup meselâ beher sene bu mevsîmlerde biraz eşhâs tuyûr ve Ezâd Kuşu nâmıyla sayd idegeldikleri kuşları sıbyana fürûht ve anlar dahi mel‘abeden add ile aldıkları kuşları ellerinde telef etmekde oldukları zâhir olduğundan fîmâ-ba‘d o makūle eşhâsın kuş sayd itmeleri husûsunun def‘i beyâz üzerine fermân-ı âlî ısdârıyla bostancıbaşı ağaya tenbîh olunmuş olmağla imdi siz dahi lâzım gelenlere tenbîh ile her ne mahallde olur ise olsun o misüllü Ezâd Kuşu fürûht ider eşhâsa rast gelünür ise kafeslerinde mahbûs olan kuşların cümlesi derhâl salıverilmek husûsuna mübâderet ve siz dahi bi’n-nefs rast gelür iseniz icrâ-yı edâda dikkat eyleyesiz deyu.

Bostancıbaşı Ağa’ya;

İmdi fîmâ-ba‘d o makūle eşhâs kuş sayd itmemek ve ideri olur ise icrâ-yı te’dîbât-ı lâzımelerine bakılmak ve men‘ ü tahzîr eylemeleri vesâyâsını ustalara ve sâ’ir lâzım gelenlere tenbîh ü te’kîde dikkat eyleye deyu.

Fî 4 L sene [12]27/11 Ekim 1812.